एमालेद्वारा गाजा सहरमा भएको आक्रमणको भर्त्र्सना

काठमाडौं, कात्तिक १ गते । नेकपा (एमाले) ले मंगलबार राति प्यालेस्टानी राज्यको गाजा सहरमा भएको आक्रमणको भर्त्र्सना गरेको छ । एमाले अध्यक्ष केपी शर्मा ओलीले बुधबार वक्तव्य जारी गर्दै गाजा सहरको अलअहरी अरब अस्पतालमा भएको आक्रमणमा परी अस्पतालमा उपचार गराइरहेको बिरामी, चिकित्सक तथा स्वास्थ्यकर्मी, बिरामी कुरुवा-आफन्त र अस्तापाल परिसरमा शरण लिइरहेका नागरिक गरी पाँच सयभन्दा बढी मारिएको खबरले स्तब्ध भएको बताउनुभयो ।

उहाँले एमाले शान्तिको पक्षमा रहेकोले जुनसुकै खालको द्वन्द्व र समस्याको समाधान शान्तिपूर्ण वार्ताद्वारा गरिनुपर्नेमा जोड दिनुपर्ने उल्लेख गर्नुभएको छ । अमानवीय आक्रमणबाट अन्तराष्ट्रिय कानुन, मानव अधिकार र मानवीयताका सबै सीमा उल्लङ्घन भएकोले यसप्रकारका सबैखले आक्रमण रोक्न एमालेले सम्बन्धित पक्षलाई आव्हान समेत गरेको छ ।