दशैंका लागि उपत्यका छाड्नेको संख्या बढ्दै, कुन दिन कति बाहिरिए ?

काठमाडौं । काठमाडौंको नागढुङ्गामा सवारी साधनको चाप बढेकाले त्यहाँबाट शुरु भएको शनिवार बिहानको जाम थानकोटसम्म आइपुगेका थियो ।

सवारी साधनको लाम शुक्रवार साँझ पनि उत्तिकै थियो ।काठमाडौंको कलङ्की होस् या गौशाला वा अन्य विभिन्न नाकामा त्यसैगरी सवारी साधनको चाप छ । यात्रुको भीड पनि उत्तिकै छ । प्रहरीलाई सवारी साधनको भीड मिलाउन हम्येहम्ये परिरहेको सडकमा देख्न सकिन्छ ।

हिन्दूको महान पर्व दशैंको मुख्य दिन नजिकिएसँगै काठमाडौँ उपत्यका छाड्ने नेपालीको सङ्ख्या दिनदिनै बढ्दो छ । अन्य समयमा शनिबार प्रायः खाली हुने काठमाडौँका सडकमा आज भने सवारी साधनको बाक्लो उपस्थिति छ । पोका/ पुन्तुरा बोकेर मानिस उपत्यका छाड्न हतारिएका दृष्य विभिन्न क्षेत्रमा देख्न सकिन्छ ।

टिकट काटेकाहरु सवारीसाधन कुरिरहेका देखिए भने टिकट नकाट्ने यात्रु सिट खाली रहेका सवारी साधनको प्रतिक्षा गरिरहेका भेटिए । सिट नपाएका ट्रक तथा अन्य सवारी साधनमा समेत गइरहेका थिए । पश्चिम नेपाल जान कलङ्की पुग्नुभएकी निर्मला शर्मा टिकट नपाइएकाले सिट खाली भएको गाडीको प्रतीक्षा गरिरहेको बताए।

काठमाडौं उपत्यका ट्राफिक प्रहरी कार्यालयका अनुसार दशैं शुरु भएपछि घटस्थापनादेखि क्रमशः बाहिरिने यात्रुको चाप बढिरहेको छ । त्यसदिन ६० हजार यात्रुले उपत्यका छाडेका थिए । बिहीबार ७१ हजार सात सय यात्रुले उपत्यका छाडेकामा शुक्रबार उपत्यका छाड्नेको सङ्ख्या ८४ हजार रह्यो ।

आज भने त्यसको तुलनामा दोब्बर (२ लाख) बढीले उपत्यका छाड्ने अनुमान गरिएको कार्यालयका सहप्रवक्ता प्रहरी उपरीक्षक अवदेश विष्ट क्षेत्रीले जानकारी दिए । शनिवार साँझसम्म झण्डै ५ लाख मानिसले उपत्यका छाडेने उनको अनुमान थियो । काठमाडौं उपत्यका ट्राफिक प्रहरी कार्यालयका अनुसार प्रहरीको अभिलेखभन्दा बाहिर रिजर्व गरेर विभिन्न नाका हुँदै जाने र निजी सवारीमा जानेको सङ्ख्या यकीन नभएकाले उपत्यका छाड्ने सङ्ख्या त्यसको दोब्बर हुनसक्ने अनुमान छ ।

यही असोज १० गतेदेखि १४ गते शुक्रवारसम्म कुल ३ लाख ५३ हजार ४८५ बाहिरिएका छन् शनिवार भने झण्डै २ लाख बाहिरिने अनुमान गरिएको छ । प्रहरीका अनुसार कुल ५० हजार सवारी साधनमा उनीहरु यसरी बाहिरिएका हुन् । शनिवारदेखि दशैं बिदा भएकाले सडकमा अत्यधिक भीड रहेको र विभिन्न नाका तथा बसपार्क क्षेत्रमा उपत्यका छाड्ने यात्रुको बाक्लो उपस्थिति रहेको प्रहरी उपरीक्षक क्षेत्रीको भनाइ थियो ।

कुन दिन कति यात्रु भित्रिए कति बाहिरिए ?
ट्राफिक प्रहरीका अनुसार असोज १० गते ८ हजार ७२९ ओटा सवारी साधानमा ४५ हजार ८२३ यात्रु भित्रिएका थिए भने ८ हजार ९०४ ओटा सवारी साधनमा ६० हजार ८४१ यात्रु बाहिरिएका थिए । असोज ११ गते ८ हजार ४२७ सवारी साधानबाट ४५ हजार ३३ यात्रु भित्रिएका मा ९ हजार १६१ सवारी साधनबाट ६२ हजार ४३२ यात्रु बाहिरिएको अभिलेख छ ।

यस्तै असोज १२ गते ८ हजार ९ सवारी साधनबाट ४५ हजार २६० यात्रु भित्रिएकामा १० हजार ८६ सवारी साधनबाट ७१ हजार ७६३ यात्रु बाहिरिएका थिए । यस्तै असोज १३ गते ८ हजार २३ सवारी साधन मार्फत सोही हाराहारीमा यात्रु भित्रिएकामा १० हजार २१९ सवारी साधनमार्फत ७४ हजार ३६२ यात्रु बाहिरिए ।

असोज १४ गते शुक्रवार भने ७ हजार ४६० सवारीमार्फत ३७ हजार ३४० यात्रु भित्रिंदा १० हजार २६७ सवारी साधनमार्फत ८४ हजार ८७ यात्रु बाहिरिएको तथ्याङ्क छ । यो प्रहरीले अभिलेख गरेको सार्वजनिक सवारी साधनमार्फत यात्रु भित्रिएका र बाहिरिएकाको विवरण हो । यसबाहेक पनि मोटरसाइकल तथा अन्य निजी सवारी साधनमार्फत बाहिरिने यात्रुको सङ्ख्या ठूलो रहेको ट्रापिक प्रहरीले बताएको छ । रासस