महँगी नियन्त्रण गर्ने लक्ष्यका साथ अमेरिकामा २८ वर्षयताकै उच्च ब्याजदर वृद्धि

अमेरिकाको केन्द्रीय बैंक फेडरल रिजर्ब(फेड)ले बढ्दो महँगी नियन्त्रण गर्नको लागि २८ वर्ष यताकै धेरै अर्थात ०.७५ प्रतिशतले व्याज दर वृद्धि गरेको छ । लामो समयमा यो कदमले महँगी घटाउने भए पनि केही महिनाभित्र भने अर्थतन्त्रमा सुस्तता ल्याउने र बेरोजगारी बढाउने प्रक्षेपण गरिएको छ ।

यसअघि लिइएका कदमले महँगी नियन्त्रणमा न्युन सफलता हासिल भएको पछिल्लो तथ्याकंले देखाएपछि बुधबार फेडले व्याज दर वृद्धिको घोषणा गरेको हो ।
अब बैंकबाट ऋण लिँदा महँगो पर्नेछ ।

अमेरिकी कंग्रेसको मध्यावधि चुनाव नजिकिँदै गर्दा महँगीका कारण राष्ट्रपति जो बाइडेन अलोकप्रिय बन्दै गएको र यसले डेमोक्रेटिक पार्टीको मतमा असर पर्ने अनुमानमाझ यस्तो कदम चालिएको प्रक्षेपण छ ।

अमेरिकामा पछिल्लो समय महँगी चार दशक यताकै उच्च ८.६ प्रतिशत पुगेपछि त्यसको असर आम मानिसले महसुस गर्न थालेका छन् ।

युक्रेनमाथि रुसी आक्रमणका कारण बढेको उर्जा मूल्यको असरबाट अमेरिका पनि अछुतो रहन सकेको छैन ।एजेन्सी