युक्रेनलाई बाइडेनको आश्वासनः रुसले आक्रमण गरे ‘निर्णायक’ कदम चाल्छौँ

अमेरिकी राष्ट्रपति जो बाइडेनले रुसले युक्रेनमाथि आक्रमण गरे निर्णाय कदम चाल्ने आश्वासन दिएका छन्। आइतबार युक्रेनी राष्ट्रपति भ्लादिमिर जिलिन्स्कीसँग टेलिफोनमार्फत कुरा गर्दै बाइडेनले यस्तो बताएका हुन्।

युक्रेन र रुसबीचको सीमामा तनाव बढिरहँदा बाइडेनले युक्रेनलाई आश्वस्त पार्ने प्रयास गरेका हुन्।

ह्वाइट हाउसकी प्रेस सेक्रेटरी जेन साकीका अनुसार बाइडेनले युक्रेनको सार्वभौमसत्ता र भौगोलिक अखण्डताको रक्षा गर्न अमेरिका प्रतिबद्ध रहेको बताएका थिए।

रुसले युक्रेनको सीमानजिक करिब एक लाख सैनिक तैनाथ गरेको छ।

अर्को साता अमेरिका, रुस र नेटो सदस्य मुलुकबीच युरोपमा वार्ता हुने तय भएको छ। जसमा नेटो पूर्वतिर विस्तार हुँदैन भनेर अमेरिकाले बाचा गर्नुपर्ने सर्त रुसले राख्दै आएको छ।

गत बिहीबार मात्रै बाइडेन र पुटिनबीच फोनवार्ता भएको थियो। एजेन्सी