अमेरिकामा किशोरले उन्मुक्ति पाउँदा बाइेन आक्रोशित

अमेरिकामा गत वर्ष रंगभेदविरुद्ध भएको प्रदर्शनको क्रममा गोली चलाएर दुई जनाको ज्यान लिने एक किशोरले उन्मुक्ति पाएपछि राष्ट्रपति जो बाइडनले आफु आक्रोशित भएको प्रतिक्रिया दिएका छन् ।

उनले फैसलाप्रति निराशा व्यक्त गरे पनि अदालतको निर्णयको समर्थन गर्ने बताएका हुन् । राजनीतिक रुपमा विभाजित सुनुवाइपछि विस्कनसिनको अदालतको जुरीले १८ वर्षका कायल रिटनहाउसलाई सबै आरोपबाट मुक्ति दिएको हो ।

सन् २०२० को अगस्ट २५ मा रिटनहाउसले विस्कनसिन राज्यको केनोशामा गोली चलाएका थिए । उनले चलाएको गोली लागेर ३६ वर्षका जोशेप रोसेनबम र २६ वर्षका एन्थोनी हुबरको ज्यान गएको थियो ।

यस्तै २७ वर्षका गेइगर ग्रोसक्रेट्ज घाइते भएका थिए । गोली प्रहार गर्ने रिटनहाउस र गोली लागेका तीनैजना श्वेत हुन् । रिटनहाउसमाथि पाँचवटा अभियोगा लागेको थियो । त्यसमा आजीवन काराबास हुन सक्ने नियतबस गरिएको हत्या अभियोग पनि थियो ।

तर १२ जना रहेको जुरीले उनलाई सबै अभियोगबाट मुक्ति दिएको हो । रिटनहाउस र उनका वकिलले आत्मरक्षाका लागि गोली प्रहार गरेको दाबी अदालतसमक्ष प्रस्तुत गरेका थिए । गएको वर्ष प्रहरीले ज्याकोब ब्लेक नाम गरेका अश्वेत अमेरिकीमाथि गोली प्रहार गरेपछि केनोशामा रंगभेदविरुद्ध प्रदर्शन भएको थियो । एजेन्सी