एनआरएनए, ५ लाख सदस्य, १०० एनसीसी पुर्याउने आचार्यको घोषणा, नागरिकताको कार्यान्वयन सर्वोच्च प्राथमिकता

गैरआवासीय नेपाली संघ (एनआरएनए) का अध्यक्षका उम्मेदवार कुल आचार्यले आफु निर्वाचित भएमा संघको पंजीकृत सदस्य संख्या ५ लाख पुराउने महत्वाकांक्षी योजना सार्वजनिक गरेका छन्।

अहिले भएको संघको सदस्य संख्या १ लाख बढी छ। त्यसमा अमेरिकाको एक्लैको २०, १३९ जना पंजीकृत सदस्य छन। अमेरिका, बेलायत, क्यानाडा र अष्ट्रेलियाले कुल पंजीकृत सदस्य संख्याको ५० % हिस्सा लिएका छन्।

जीएनएनसंग कुरा गर्दै आचार्यले थप मुलुकहरुमा संघका शाखा विस्तार गरेर तथा राष्ट्रिय समन्वय परिषदहरुलाई क्रियाशील गराएर सदस्य संख्या पांच गुना बढाउने आफुले योजना ल्याएको खुलासा गरे। तर यसलाई ५ लाख मात्र सिमिति होइन त्यो भन्दा पनि धेरै पुर्याउने हो।

उनले संघका राष्ट्रिय समन्वय परिषद (एनसीसी) हरुको संख्या १०० भन्दा बढी पुर्याउने पनि बताए। हालसम्म ८४ देशमा एनआरएनए पुगेता पनि बीस भन्दा बढी एनसीसी निष्कृय रहेका छन्। ६४ देशले मात्र अधिवेशन गरेर सक्रियता देखाएका छन्।

आचार्यले तेस्रो पुस्ता पछिका गैरआवासीय नेपालीहरुको नेपालमा पैतृक सम्पत्तिको अधिकार सुरक्षित गर्नुका साथै राहदानी सहित नागरिकताको अधिकार स्थापित गर्ने आफ्नो योजना रहेको बताए। मैले प्रधानमंत्री शेर बहादुर देउवा लगायत प्रमुख दलका नेताहरूसंग भेटवार्ता गरेको छु, उहाँहरु सबैजना यस बिषयमा सकारात्मक हुनुहुन्छ, आचार्यले भने।

म्यान्मार, थाइल्याण्ड लगायतका मुलुकमा बसोबास गरिरहेका नेपाली मूलका दाजुभाइ दिदी बहिनीहरुलाई “पिपुल अफ नेपाली अरिजिन” (PNO) को मान्यता दिलाउन अधिकतम प्रयास गर्नेछु, उनले भने।

उनले सुरक्षित र मर्यादित वैदेशिक रोजगारीका लागि अभियान सञ्चालन गर्ने पनि बताए। एक एनआरएन एक रोजगार अभियान संचालन गरिने

संघका सल्लाहकार तथा पूर्व केन्द्रीय उपाध्यक्ष रही सकेका आचार्यले कोभिडका कारण रोजगारी गुमाएर फर्केका युवाहरुका लागि ‘एक एनआरएन एक रोजगार अभियान’ शुरु गर्ने घोषणा पनि गरेका छन्।नेपाल सरकार तथा निजी क्षेत्रसंगको सहकार्यमा ‘एनआरएनए सीप विकास केन्द्र’ स्थापना गर्ने र पछि सातै प्रदेशमा ती केन्द्रहरुको विस्तार गर्ने आफ्नो योजना रहेको उनले सुनाए।

गैरआवासीय नेपाली तथा नेपालमा रहेका तिनका परिवारलाई सहुलियत दरमा गुणस्तरीय सेवा उपलब्ध गराउन विभिन्न स्वास्थ्य संस्थाहरुसंग सम्झौता गरिने कार्ययोजना बनाएका आचार्यले विदेशमा हुर्कीरहेका बालबालिकाहरुलाई नेपाली भाषा सिकाउन पाठ्यपुस्तक र मोबाइल एप निर्माण गर्ने र अनलाइन कक्षाहरु संचालन गरिने पनि बताए।

गैरआवासीय नेपाली खेल प्रतिभाहरुको विकासमा सघाउन एनआरएनए खेलकुद प्रतिष्ठान स्थापना गर्ने पनि उनको योजना छ।

आचार्यले हालसम्मको आफ्नो अनुभव र नयाँ कार्ययोजनाका आधारमा संसारभर फैलिएका नेपालीहरुलाई मातृभूमिसँग जोड्दै अगाडि बढ्ने आफ्नो योजना रहेको बताए। उनले आफ्नो उम्मेदवारीबारे छिट्टै एक कार्यक्रम मार्फत औपचारिक घोषणा गर्ने पनि जनाए।