साढे ६ प्रतिशतले बढ्यो अमेरिकी अर्थतन्त्र

-


     नेपालय न्युज    
     श्रावण १७ गते २०७८


वाशिङ्टन डीसी (अमेरिका) । यस वर्षको दोस्रो त्रैमासमा अमेरिकी अर्थतन्त्र वार्षिक साढे ६ प्रतिशतले बढेको छ । अमेरिकी वाणिज्य मन्त्रालयले सार्वजनिक गरेको पछिल्लो तथ्यांकले यस्तो देखाएको हो । पछिल्लो वृद्धिसँगै अर्थतन्त्रको आकार महामारीपूर्वको स्तरमाथि पुगेको छ ।

समीक्षा अवधिमा जीडीपीको ७० प्रतिशत हिस्सा ओगटेको उपभोक्ता खर्चमा उल्लेख्य वृद्धि भएको छ । आप्रिल–जुन त्रैमासमा उपभोक्ता खर्च ११ दशमलव ८ प्रतिशतले बढेको छ ।

पूँजीगत लगानीमा पनि ८ प्रतिशतको वृद्धि भएको छ । कोरोना भाइरस विरोधी खोप कार्यक्रम अगाडि बढेको र बृहत स्तरका आर्थिक उपायका कारण जीडीपीमा वृद्धि भएको हो । जीडीपीमा सकारात्मक वृद्धि देखिएको यो लगातार चौथो त्रैमास हो ।

यद्यपि वृद्धिको यो दर अर्थशास्त्रीहरुले अनुमान गरेको भन्दा चाँहि कम हो । दोस्रो त्रैमासमा अमेरिकी अर्थतन्त्र ८ प्रतिशत भन्दा धेरैले बढ्ने अनुमान गरिएको थियो ।

पछिल्लो समय अमेरिकामा फैलिरहेको कोरोना भाइरसको संक्रामक प्रकार डेल्टा भ्यारिएन्टका कारण संक्रमण बढेर थप लकडाउन हुने चिन्ता देखिएको छ ।

कम्पनीहरुले पर्याप्त कर्मचारी पाउन सकेका छैनन् । सरकारको स्टिमुलस कार्यक्रम बन्द भएपछि उपभोक्ता खर्च पनि घट्ने विश्लेषकहरुले बताएका छन् । रासस/एपी

WP2Social Auto Publish Powered By : XYZScripts.com